Friday, 15 March 2013

चीन सशंकित, भारत र अमेरिका खुशी


   काठमाडौँ, चैत २ (नेपाल डोर) । नेपालमा उत्पन्न पछिल्लो राजनीतिक परिस्थितिप्रति छिमेकी चिन र भारत एवं अमेरिकाले तत्काल प्रतिक्रिया दिएका छन् । नेपालस्थित भारतीय राजदूतावास र अमेरिकी दूताबासले विज्ञप्ति जारी गरेर प्रधानन्यायाधीशलाई सरकारप्रमुख बनाउने गरी भएको दलीय सहमतिको स्वाथत गरे ।
 तर बेइजिङमा पत्रकार सम्मेलनमा बोलेका चिनियाँ विदेश मन्त्रालयका प्रबक्ताले पछिल्लो परिस्थितिको स्वागत वा विरोध गरेनन्, दलहरुलाई सहमतिका लागि अघि बढ्न आग्रह गरे । वर्तमान परिस्थितिको जग पश्चिमा मुलुकहरुले बनाएको आशंकलाई मद्दत पुग्नेगरी चिनले यो प्रक्रियाप्रति संका व्यक्त गरेको छ ।
भारतीय प्रधानमन्त्री डा. मनमोहन सिंहले त ‘लोकतान्त्रिक उपलब्धीलाई मजबुत पार्ने तथा बहुदलीय लोकतन्त्रलाई संस्थागत गर्ने राजनीतिक प्रत्रिया अघि बढाउने महत्वपूर्ण पाइला’ भनेर दलहरुबीचको सहमति र सरकार गठनप्रति खुशी व्यक्त गरे । मन्त्रीपरिषद अध्यक्ष खिलराज रेग्मीलाई १ चैतमा पठाएको बधाई सन्देशमा प्रधानमन्त्री सिंहले नेपाली जनताको स्थिर, लोकतान्त्रिक र सम्बृद्ध नेपाल निर्माण गर्ने प्रयासलाई भारतले सहयोग गर्ने बचन दिए । भारतीय विदेशमन्त्री सलमान खुर्सिदले पनि नेपाली समकक्षी माधव घिमिरेलाई सन्देश पठाएर नयाँ निर्वाचनसहित नेपाल सरकारको आकांक्षा र प्राथमिकता अनुसार सहयोग गर्न भारत तयार रहेको बताएका छन् ।
चीनले अन्तरिम मन्त्रीपरिषदगठन गठन गरी संविधान निर्माण प्रक्रियालाई अघि बढाउने गरी प्रमुख दलहरुबीच समझदारी भएको भन्ने विश्वास गरेको छ ।  ‘मित्रवत छिमेकीका रुपमा हामीले अपेक्षा गरेका छौँ कि नेपालका राजनीतिक शक्तिहरुले वार्ता र छलफलबाट राजनीतिक सहमति खोज्न निरन्तर लाग्ने, सकेसम्म चाँडो शान्ति तथा संविधान लेखन प्रक्रिया सम्पन्न गर्ने र मुलुकलाई राजनीतिक स्थायित्व र आर्थिक विकासको प्रत्याभूति दिने गरी नेतृत्व गर्न सक्षम हुनेछन्’ चिनियाँ विदेश मन्त्रालयका प्रबक्ताले बेइजिङमा आयोजित नियमीत पत्रकार सम्मेलनमा भनेका छन् ।
अमेरिकाले राष्ट्रिय चुनावको जिम्मेवारी वहन गर्ने गरी भएको नयाँ अन्तरिम चुनावी मन्त्रिपरिषद् गठनको स्वागत गरेको छ । अमेरिकी राजदूतावासद्वारा चैत्र १ मा जारी विज्ञप्तिमा जटिल एवम् चुनौतीपूर्ण अवस्थामा राजनीतिक दलहरूले समस्या समाधानका निम्ति  तत्परता देखाएर सम्झौता गरेको भन्दै सराहना गरिएको छ ।  “यो अन्तरिम चुनावी मन्त्रिपरिषद्को गठनले नेपालको नयाँ संविधान लेख्ने काम सम्पन्न गर्ने र नेपाली जनताको आकाँक्षाको प्रतिनिधित्व गर्ने गरी आगामी असारमा स्वतन्त्र, निष्पक्ष र समावेशी राष्ट्रिय निर्वाचनको कार्य सम्पन्न गर्ने जस्ता महत्वपूर्ण कार्यहरूको लागि जग बसाल्नेछ”, विज्ञप्तिमा भनिएको छ ।
 

No comments:

Post a comment

top sidebar ads

समाचार

समाचार

recent posts comments tab

Blog archive