Friday 15 March 2013

जंगी अड्डामा हाँसो र कटाक्ष

वर्तमान र भूपू चिफले के के भने ?

काठमाडौं, चैत २ (नेपाल डोर) । चैत १ मा सैनिक हेडक्वार्टर भद्रकालीमा शुरु भएको नेपाली सेनाको पृतना सम्मेलनमा यसबर्ष बहालवाला मात्र नभएर भूतपूर्व उपरथीमाथिका जर्नेललाई पनि निम्ता थियो । सम्मेलनमा पूर्व प्रधानसेनापतिहरु धर्मपालवरसिंह थापा, अर्जुननरसिंह राणा, प्यारजंग थापा, छत्रमानसिंह गुरुङ थिए भने  निम्ता पाएर पनि प्रज्ज्वल शमशेर राणा, गडुल शमशेर राणा, रुक्मांगद कटवाल गएनन् । २०५८ जेठ १९ गते दरवार हत्याकाण्डका बेला प्रधानसेनापति रहेका प्रज्ज्वल सैनिक कार्यक्रममा सहभागी हुन छाडेको बर्षौँ भइसकेको छ
पृतनापतिलगायत जंगी अड्डाका कार्यालय, विभाग, महानिर्देशनालय तथा निर्देशनालयका प्रमुखहरु सहभागी सम्मेलनमा सहभागी पूर्व रथी चित्रवहादुर गुरुङले पूर्व सेनापति धर्मपालवरसिंह थापाप्रति कटाक्ष गरेका थिए ।  थापाले कल्याणकारी कोषमा रकमको व्यवस्थापन कसरी गर्ने भन्ने बिषयमा धारणा राखेका थिए । उनले समसामयिक परिस्थिति, सेनाको संगठन कसरी चुस्त राख्ने लगायतका बिषयमा केही बोलेनन्, केबल रकम र हिसाबकिताबका बारेमा भाषण खर्चिए । त्यसैले होला उनलाई कटाक्ष गर्दै पूर्व रथी गुरुङले ‘धर्मपाल चिफसापले आर्थिक कुरा राख्नुभो, उहाँलाई अर्थको मामिलामा कसले सक्छ र ?’ भन्दै कटाक्ष गरेका थिए । उनले बोलेपछि हलभरि हाँसो गुन्जिएको थियो । 
पूर्व उपरथी यादब रायमाझीले सेनापतिलाई मुख्यसचिव भन्दा मुनि तथा रथीलाई सरकारको सचिव भन्दा मुनि राख्ने गरी बरियता तोकिएको भन्दै बिरोध जनाएक थिए । उनले सरकारी निर्णय प्रकाशन भएको राजपत्रको फोटोकपी नै बाँडेका थिए । राजपत्र नै बोकेर गएका रायमाझीलाई कतिपयले चाहिँ खिसिटिउरी गरेका थिए भने राजेन्द्र थापा लगायत कतिपय पूर्व उपरथीले राजसंस्था हुँदा र अहिले सेनापतिको हैसियत एउटै नभएको हुनाले परिवर्तनलाई स्वीकार गर्नुपर्छ भनेरु रायमाझीलाई जबाफ दिएका थिए ।
सेनाको लोकतान्त्रिकरणका बिषयमा सबैजसोले आपत्ति जनाउँदै भनेका थिए, ‘सेनाको लोकतान्त्रिकरण होइन, आधुनिकीकरण र सुदृढीकरण गर्ने हो ।’ प्रधानसेनापति गौरब शमशेर जबराले सेनामा पूर्व लडाकुको समायोजन, सैनिक नियमावलीमा संशोधनलगायतका बिषयमा धारणा राखेका थिए । प्रधानसेनापतिले शान्तिप्रक्रियालाई सम्पन्न गर्न सेनाले पूर्व लडाकुलाई सैनिक मापदण्डका आधारमा समायोजनमा ल्याएको जानकारी दिएका थिए । उनले सेनाको नयाँ महानिर्देशनालय अन्तर्गत तीनवटा निर्देशनालय र ६ वटा गण रहने तथा अधिकांश उपत्यका बाहिर तैनाथ गरिने पनि जानकारी दिएका थिए ।  राणाले नयाँ महानिर्देशनालय बनाउने निर्णय गरे पनि साधनस्रोतको व्यवस्थापन नभएको भन्दै सरकारप्रति घुमाउरो असन्तुष्टि जनाए ।
सेनापतिले क्षमतावान व्यक्तिलाई अघि बढाउने गरी सैनिक नियमावली ल्याएको प्रष्टीकरण दिएका थिए । उनले सेनाको आधुनिकीकरणका लागि पाँच बर्षे र दशबर्षे रणनीति ल्याएको पनि जानकारी दिएका थिए । सैनिक नियमावली संशोधन गर्ने निर्णयप्रति पूर्व रथी सिबी गुरुङले खुलेरै प्रधानसेनापति जबराको प्रशंसा गरेका थिए । सम्मेलनमा करिब दुईदर्जन अबकासप्राप्त सैनिक अधिकृतहरु सहभागी थिए ।


No comments:

Post a Comment

top sidebar ads

समाचार

समाचार

recent posts comments tab

Blog Archive