Friday 5 April 2013

देशभर आगो निभाउँदै सशस्त्र प्रहरी टोली

काठमाडौं (नेपाल डोर) । विभिन्न स्थानमा भएको आगलागी नियन्त्रणमा एपीएफ टोली परिचालन भएको छ । चैत्र २२ गते सिरहा जिल्लाको फुलकाहकट्टी १ स्थित सिमरा भन्ने स्थानमा भएको आगलागी नियन्त्रणमा एपीएफ टोली सक्रियताका साथ जुटेको छ । आगलागी भएको जानकारी प्राप्त हुनासाथ सशस्त्र प्रहरी बल सुरक्षा बेस सुखीपुरबाट खटिएको एपीएफ टोली तत्काल आगलागीस्थलमा पुगेर आगलागी नियन्त्रणमा जुटेको थियो ।
    उक्त आगलागीबाट त्यसठाउँका आठवटा घरमा क्षति पुग्नुका साथै करीब एक करोड ४५ लाख रुपैयाँ बराबरको धनमाल क्षति भएको बताइएको छ । सो आगलागीमा परी पाँच जना मानिस सामान्य घाइते भएका छन्
    आगलागी नियन्त्रणमा एपीएफ टोलीको साथै नेपाली सेना, स्थानीय प्रहरी, दमकल र स्थानीय बासिन्दाको सक्रियता रहेको थियो ।     बिजुलीको तार सर्ट भई दिउँसो करीब साँढे एकबजे आगलागी भएको बताइएको सो आगलागी करीब दुई घण्टाभित्र नियन्त्रणमा ल्याइएको थियो ।
    यसैगरी इलामको फिक्कलमा चैत्र २२ गते राती भएको आगलागी एपीएफ टोलीले नियन्त्रणमा ल्याएको छ । उक्त आगलागी नियन्त्रणका लागि सशस्त्र प्रहरी बल सुरक्षा वेस फिक्कलबाट खटिएको एपीएफ टोली आगलागी भएको जानकारी पाएको केही बेरमै त्यसठाउँमा पुगेको थियो । एपीएफ टोलीका साथै स्थानीय प्रहरी र स्थानीय बासिन्दाको समेत प्रयासमा सो आगलागी करीव एक घण्टाभित्रै नियन्त्रणमा ल्याइएको थियो ।    आगलागीबाट सो ठाउँका तीनवटा घरमा क्षति पुगी करीब २१ लाख रुपैयाँ बराबरको धनमाल क्षति भएको बताइएको छ ।
    यसैगरी रौतहट जिल्लाको देवही गाविस ९ करुनिया गाउँमा चैत्र २२ गते दिउँसो भएको आगलागी सशस्त्र प्रहरी बल सुरक्षा वेस देवहीबाट खटिएको एपीएफ टोली, दमकल, स्थानीय प्रहरी र स्थानीयवासीले नियन्त्रणमा ल्याएको छ । स्थानीय जुवेट अन्सारीको घरमा अचानक आगो सल्किन गई सो घरसहित अन्य तीनवटा घरमा क्षति पुग्नुका साथै करीव २२ लाख रुपैयाँ बराबरको धनमाल क्षति भएको बताइएको छ ।     आगलागी भएको खबर पाउनासाथै सो वेसबाट परिचालित एपीएफ टोली तत्काल आगलागीस्थलमा पुगेर आगलागी नियन्त्रण गर्ने कार्यमा सक्रियताका साथ जुटेको थियो ।
    यसैगरी कपिलवस्तुको कजरहवा ४ मा चैत्र २२ गते आगलागी भएको छ । अपरान्ह करीव चार वजे भएको उक्त आगलागी सशस्त्र प्रहरी बल सीमा सुरक्षा पोष्ट खुनुवाबाट खटिएको एपीएफ टोली, स्थानीय प्रहरी, दमकल र स्थानीय वासिन्दाले नियन्त्रणमा ल्याएको छ । आगलागी भएको जानकारी प्राप्त हुनासाथै खटिएको एपीएफ टोलीले स्थानीयको सहयोगमा उक्त आगलागी नियन्त्रणमा ल्याएको थियो ।     सो आगलागीबाट १२ वटा फुसको घर, गोठ र नजिकैको विद्यालयमा समेत क्षति पुगी दश लाख रुपैयाँभन्दा बढीको धनमाल क्षति भएको बताइएको छ ।
    त्यसैदिन बारा जिल्लाको रतनपुरीमा भएको आगलागी नियन्त्रणमा सशस्त्र प्रहरी बल सुरक्षा वेस निजगढको एपीएफ टोली सक्रियताका साथ जुटेको छ । दिउँसो पौने चार वजेतिर स्थानीय शंकर चौधरीले बाँसघारीको पत्कर सफा गर्ने क्रममा बालेको आगो सल्किन गई उक्त आगलागी भएको बताइएको छ ।
    तत्काल आगलागीस्थलमा पुगेको एपीएफ टोलीका साथै स्थानीय प्रहरी, दमकल र स्थानीय वासिन्दाको संयुक्त प्रयासमा उक्त आगलागी नियन्त्रणमा ल्याइएको थियो । आगलागीबाट त्यसठाउँका दुईवटा घरगोठमा क्षति पुग्नुको साथै खाद्यान्न, लत्ताकपडा, अन्य धनमाल गरी करीव ११ लाख रुपैयाँ बराबरको सामाग्री क्षति भएको बताइएको छ ।

No comments:

Post a Comment

top sidebar ads

समाचार

समाचार

recent posts comments tab

Blog Archive