एसएसपी र एसपीमा बढुवा

काठमाडौं (नेपालडोर) । गृहमन्त्रालयले नेपाल प्रहरीमा रिक्त रहेका ८ र विशेष पद श्रृजना गरेर १ प्रहरी वरिष्ठ उपरीक्षक (एसएसपी) र ११ प्रहरी उपरीक्षक (एसपी) मा बढुवा गरेको छ ।
    शुक्रबार राति गरिएको बढुवामा गत वर्ष एसएसपी हुनबाट रोकिएका ठाकुरराम बर्तौला १८ दिनपछि उमेर हदका कारण अवकास पाउँदैछन् । उनलाई विशेष पद श्रृजना गरेर बढुवा गरिएको छ । बढुवा हुने अन्यमा पुष्पचन्द रञ्जित, धिरु बस्नेत, ज्ञानविक्रम शाह, श्यामबहादुर खत्री र शरद चन्द, मनोज न्यौपाने, बलराम शर्मा पौडेल र पवनप्रसाद खरेल छन् । उनीहरुको पोस्टिङ पनि भएको छ । बर्तौला प्रधान कार्यालय, रञ्जित युएन जगेडा, बस्नेत सुदुरपश्चिम तालिम केन्द्र, शाह प्रधान कार्यालय, खत्री तालिम केन्द्र महाराजगञ्ज, चन्द प्रधान कार्यालय सवारी नियन्त्रण महाशाखा, न्यौपाने प्रधान कार्यालय अन्वेशण योजना महाशाखा, पौडेल र खरेल प्रधान कार्यालय जगेडा पुलमा खटाइएको छ ।
    आइतबारदेखि आगामी संविधान सभा निर्वाचनको आचार संहिता लागू हुने भएपछि सरकारले अन्तिम अवस्थामा बढुवा गरेको हो । डिआईजीमा बढुवा भएका ५, रविराज श्रेष्ठ बर्खास्त, भारतीय दुतावासमा कार्यरत एक एसएसपीको क्यान्सरले मृत्युपछि रिक्त ७ र अख्तियारमा एक थप तथा विशेष पद सृजना गरेर ९ जनाको बढुवा भएको हो । आईजीपी कुवेरसिह रानाले कार्यक्षमतालाई आधार मानेर बढुवा गर्ने भने पनि यो बढुवा पनि बिवादित नै देखिएको छ । बिवादित छवी भएकाको बढुवा भएको र केही दक्ष छुटेको प्रहरी अधिकारीहरु बताउँछन् ।
    डिएसपीबाट एसपीमा ११ जनाको बढुवा भएको छ । बढुवासँगै उनीहरुको पनि दरबन्दी मिलान गरिएको छ । सानुबाबु थपलिया, किशोरकुमार दाहाल, भोजराज ओझा, नलप्रसाद उपाध्याय, नरबहादुर खत्री, हरिराज वाग्ले, भोजजंग शाह, मोहनकुमार आचार्य, हिमबहादुर लामा, देबबहादुर बोगटी, प्रदिपकुमार श्रेष्ठको बढुवा भएको हो ।
    एसएसपीमा बढुवा गर्न आईजी रानाले आफ्ना पिए पुस्कर कार्की र विक्रम थापाको विषयमा ठूलो अडान लिएका थिए । सिफारिस समितिमा उनीहरुका नाममा बिवाद भएपछि उनीहरु बढुवा हुन सकेनन् ।