Friday, 7 June 2013

प्रहरी प्रधान कार्यालयको प्रस्ताव गृहबाट अस्विकार


काठमाडौं (नेपालडोर) । उपमहानगरपालिका रहेका जिल्लामा प्रहरी वरिष्ठ उपरीक्षक (एसएसपी) दरबन्दी राख्न प्रहरी प्रधान कार्यालयले गरेको प्रस्ताव असफल भएको छ । गृहमन्त्रालयले प्रधान कार्यालयको प्रस्ताव अस्विकार गरेको हो । पहाडका प्राय साना जिल्लामा प्रहरी नायव उपरीक्षक, तराईकामा प्रहरी उपरीक्षक दरबन्दी छ । 
उपमहानगरपालिका भएका पर्षा, मोरङ र कास्की जिल्लामा एसएसपी राख्न प्रस्ताव गर्दै निर्णयका लागि प्रधान कार्यालयले गृहमन्त्रालयमा पठाएको थियो । गृहले अञ्चल कार्यालयमा एसएसपीको दरबन्दी भएको र उपमहानगरपालिका भएका जिल्लामा एसएसपी दरबन्दी दिएमा अञ्चल र जिल्ला प्रहरी कार्यालयबीच पदीय हैसियतको कुरा उठ्ने भन्दै कार्यसम्पादनमा समस्या हुने तर्क राखेको छ । त्यही तर्कका आधारमा गृहले स्तरोन्नति दरबन्दी स्वीकृत नगरेको गृहमन्त्रालय श्रोतले बतायो । 
प्रहरी प्रवक्ता प्रहरी नायव महानिरीक्षक केशव अधिकारीले आफूले पनि गृहबाट प्रस्ताव अस्विकृत भएको सूचना पाएको बताए । उनले गृहबाट प्रस्ताव फिर्ता आएको जानकारी आफूसँग नभएको बताए । 
प्रधान कार्यालयले उक्त प्रस्ताव असफल भएपछि ५ एसएसपीको दरबन्दी थप गर्ने अर्काे प्रस्ताव तयार पारेको छ । प्रधान कार्यालयले मानवअधिकार, सम्पति शुद्धिकरण, राजश्व अनुसन्धान, अख्तियार र कानुन महाशाखामा हाल प्रहरी उपरीक्षक (एसपी) दरबन्दी भएकोमा स्तरवृद्धि गर्दै एसएसपी राख्ने प्रस्ताव तय गरेको छ । श्रोतका अनुसार प्रहरी महानिरीक्षक (आईजीपी) कुवेरसिंह रानाको प्रस्ताव गृहले अस्विकार गरेपछि विकल्पमा उनले अर्काे प्रस्ताव तयार गरेका हुन् । 
आईजीपी रानाको दोश्रो प्रस्ताव गृहले स्वीकृत गर्ने या नगर्ने टुंगो छैन । आईजीपी राना भने एसएसपीमा रिक्त ६ र नयाँ ५ समेत ११ जना एसपीको बढुवा एकैपटक गर्ने तयारीमा छन् । उनका निकटहरुका अनुसार आईजीले दुई साताभित्र ५जना एसएसपीको दरबन्दी थप गर्ने र बढुवा गर्ने तयारी थालेका छन् । श्रोतहरुका अनुसार दरबन्दी थप गर्न नसकेमा वरियतामा अगाडि रहेका एसपीलाई एसएसपी बनाउने तथा दरबन्दी थप भएमा वरियता र आफूनिकट कनिष्ठलाई पनि बढुवा गर्ने तयारी सुरु गरेका छन् । 
प्रहरी प्रवक्ता नायव महानिरीक्षक अधिकारी एसपीको बढुवा बाहिर चर्चामा आएजस्तो नभएको बताउँछन् । उनले भने, ‘डिआईजीमा बढुवापछि रिक्त ५ र रविराज श्रेष्ठलाई बर्खास्त गरेपछि रिक्त रहेका ६ एसएसपीको बढुवा हुन्छ, तर समय लाग्छ ।’ 
प्रहरीमा प्रकाश अर्याल, नवराज सिलवाल, जयबहादुर चन्द र बमबहादुर भण्डारीको डिआईजीमा बढुवा हुँदा वरियता भन्दा कार्यक्षमता हेरिएको थियो । आईजीपी राना ६ जनामात्र बढुवा गर्नु परेमा पुनः वरियतालाई आधार मानेर बढुवा गर्ने तयारी थालेपछि कार्यक्षमता भएका कनिष्ठ एसपीहरु क्रुद्ध बनेको श्रोतहरुको भनाइ छ । एकपछि अर्काे गर्दै आईजीपी राना संगठनको अहितमा काम गर्न थालेको भन्दै वरियतामा अगाडि रहेका उच्च अधिकारीहरु आईजीपी रानाविरुद्ध मोर्चाबन्दीमै उत्रिन थालेको श्रोतहरुको भनाइ छ । 
   

No comments:

Post a comment

top sidebar ads

समाचार

समाचार

recent posts comments tab

Blog Archive