नरिवलमा चरेश

काठमाडौं (नेपालडोर) । प्रहरीलाई झुक्याउन चरेस कारोबारीले अनौठो तरिका अपनाएका छन् । यसअघि मूर्ति, सुन्तला, खामलगायतमा राखेर कुरियरमार्फत कारोबार गर्दै आएका कारोबारीले पछिल्लोपटक नरिवलभित्र राखेर तेस्रो मुलुकमा चरेस पठाउने गरेको खुलेको छ । जटासहितको नरिवल ड्रिल मेसिनले प्वाल पारेर पानी निकाली चरेसको घोल राखेर बन्द गरी विदेश पठाउन सक्रिय कारोबारीलाई प्रहरीले पक्राउ गरेको हो ।
प्रहरीको लागुऔषध नियन्त्रण ब्युरोले कुरियरबाट हङकङ पठाउन तयारीमा रहेको ७ सय १४ ग्राम चरेस र नरिवल ३ थान नियन्त्रणमा लिएको छ । काठमाडौं सुन्धारामा रहेको सुप्रिम कुरियरबाट पूजापाठका लागि भनेर पार्सल बनाई हङकङ पठाउन बुक गरेको सामान शंका लागेर परीक्षण गर्दा प्रहरीले चरेस फेला परेको हो । कुरियरले शंका गरेर प्रहरीलाई खबर गरेको थियो । ब्युरोका प्रहरीले परीक्षणपछि नरिवलभित्र चरेसको घोल रहेको पत्ता लगाएका थिए ।
गुल्मी स्थायी घर भई काठमाडौं सितपाइलामा डेरा गरी बस्दै आएका कृष्णप्रसाद श्रेष्ठ (४७) ले कुरियरबाट पठाउन लागेको नरिवलभित्रको चरेस प्रहरीले आइतबार पक्राउ गरेको हो । श्रेष्ठको कोठाबाट २ किलो चरेस, जटासहितको पाँच थान काँचो नरिवल  र जटा नभएको नरिवल ११ थान बरामद गरेको ब्युरो प्रमुख प्रहरी नायव महानिरीक्षक (डिआइजी) केदारप्रकाश साउदले जानकारी दिए ।
यही प्रकरणमा काभ्रे श्यामपाटीका सुुनिल तामाङ पनि पक्राउ परेको प्रहरीले जनाएको छ ।  तामाङले हङकङमा लागुऔषध कारोबार गर्दै आएको प्रहरीको भनाइ छ । नेपालको चरेस हङकङ हुँदै युरोपसम्म ओसारपसार भइरहेको छ ।
ब्युरोले देशमा सञ्चालन भइरहेका कार्गाे र कुरियर सञ्चालकलाई अनुशिक्षण दिने गरेको छ । अनुशिक्षणमा पाएको ज्ञानकै कारण कुरियरबाट पठाउन लागेको चरेस फेला परेको ब्युरोका प्रहरी वरिष्ठ उपरीक्षक रणबहादुर चन्दले बताए । चन्दका अनुसार देशभर रहेको सबै कार्गाे र कुरियरले अनुशिक्षणपछि प्रहरीलाई सहयोग गर्दै आएका छन् ।
सिन्धुपाल्चोकका गम्भीरमान श्रेष्ठको परिवार नै लागुऔषध कारोबारमा संलग्न रहेको छ । पटकपटक पक्राउ पर्दै आएका श्रेष्ठले छोरीहरू उर्मिला र सीतासमेतलाई औषधियुक्त लागुऔषध कारोबारमा संलग्न गराएको प्रहरीको भनाइ छ । प्रहरीले उनीहरूका साथबाट बुप्रेनर्फिन र डाइजेपाम बरामद गरेको छ ।
लागुऔषध नियन्त्रण ब्युरोले पाकिस्तानबाट आयात भएको सेतो हेरोइन ९ ग्राम काठमाडौं कपनबाट नियन्त्रणमा लिएको छ । उक्त हेरोइन नुवाकोटकी सरस्वती विश्वकर्मा र मकवानपुरका यज्ञकुमार सापकोटाका साथबाट बरामद भएको हो । सरस्वतीका श्रीमान् राम विक गत मंसिरमा ९८ ग्राम सेतो हेरोइनसाथ पक्राउ परेका छन् । उनले कारबाही भोगिरहेको समयमा उनकी पत्नी पनि पक्राउ पर्नुले कारोबारीहरू परिवार नै संलग्न भएको प्रहरीले जनाएको छ ।