Thursday, 14 May 2015

'अमेरिकी हवाई सेनाको हेलिकोप्टर सुनखानी कटेको रेकर्ड भेटिएन'

-पर्शुराम काफ्ले-
...............................

मंगलवार गएको
ठूलो भूकम्पपछि स्थानीयको खोज र  उद्दारका लागि दोलखा गएर सम्पर्कविहीन भएको अमेरिकी हेलिकोप्टर विहीवार दिउँसोसम्म फेला परेको छैन । युएस मरिन कप्र्सको युएच–१वाई हुवे हेलिकोप्टरको खोजीका लागि मंगलवार, बुधवार र विहीवार नेपाली सेना र अमेरिकी सेनाका गरी आधादर्जन हेलिकोप्टर सक्रिय रहे । हेलिकोप्टरले सम्भावित क्षेत्रमा पातपात खोजे, तर भेटिएन । सेनाले हेलिकोप्टर दोलखाको सुनखानीभन्दा पूर्वतिर नगएको जनाएको छ । सवार नेपाली सैनिक अधिकृत र अमेरिकी सैनिकहरुको मोबाइल फोनको ट्रयाक रेकर्डका आधारमा सुनखानी नकटेको देखिएको हो ।
हेलिकोप्टरमा युएसएआइडीका दुईकर्मचारी तथा चारजना अमेरिकी सैनिक र दुईजना नेपाली सैनिक सवार हेलिकोप्टर  मंगलवार दिउँसोबाट सम्पर्कविहीन थियो ।  मंगलवार साँझ र बुधवार दिनभर र विहीवार दिउँसोसम्म सेनाको भैरवनाथ, युद्धभैरब र महावीर (रेन्जर) गणलगायतको टोली अमेरिकी हेलिकोप्टर खोजीमा सक्रिय थिए । दिनभर उनीहरुले तामाकोसी नदी र वरपरका स्थानमा खोजी जारी राखे पनि पत्ता लागेन । ‘हाम्रो टोली खोजीका लागि दिनरात सक्रिय छ तर अहिलेसम्म फेला पर्न सकेको छैन’ सैनिक प्रबक्ता सहायकरथी जगदीश चन्द्र पोखरेलले भने ।
दोलखाको सिँगटीस्थित नेपाल विद्युत प्राधिकरणको सबस्टेशन क्षेत्रमा आकस्मिक अवतरण गरेको चर्चा चले पनि सेनाको एउटा टोली बुधवार र विहीवार पुग्दा हेलिकोप्टर नभेटेको सैनिक अधिकारीहरुको दाबी छ । ‘हाम्रो सिंगटीमै एउटा टोली छ, हेलिकोप्टरको खोजीका लागि थप टोली खटिएको छ र बुधवार दिउँसो हेलिकोप्टरमा काठमाडौंबाट टोली समेत पठाइएको छ’ सैनिक स्रोतले भन्यो, ‘सबैले खोज्दा पनि सिंगटी र आसपासमा हेलिकोप्टर भेटिएन । ’ अमेरिकी हेलिकोप्टर खोजीका लागि चरिकोटस्थित सेनाको बर्दबहादुर गणमा दुईवटा हेलिकोप्टर स्ट्याण्ड बाई  राखिएको छ ।
हेलिकोप्टरमा एकजना सम्पर्क अधिकृत र अर्का सुरक्षा गार्ड रहे पनि नेपाली सेनाले उनीहरुबारे सार्वजनिक गरेको छैन । मंगलवार र बुधवार  लापिलाङ्ग, लामिडांडा, सुनखानी, क्षेत्रपा र जुभु क्षेत्रमा सैनिक हेलिकोप्टरले खोजी कार्य तीब्र पारेको थियो ।
सवार सैनिकहरुको मोबाईलको सीमकार्डबाट सम्भावित लोकेसन सुनखानी पूर्वको जंगल क्षेत्र देखाएपछि विहीवार सेनाले त्यस क्षेत्रमा खोजी गर्ने भएको छ । खोजीका लागि गएको नेपाली सैनिक हेलिकोप्टरको टोलीमध्ये दुईवटा चरिकोट र दुईवटा सिन्धुपाल्चोक सदरमुकाम चौतारामा राखिएको छ । विहीवार अमेरिकी र नेपाली सेनाको टोलीले सुनखानीछेउछाऊको  जंगलमा खोजी गरिरहेको छ ।
नेपाली सेनाका एकजना क्याप्टेन र जम्दार पनि हेलिकोप्टरमा सवार छन् । उनीहरुको परिवारको संवेदनशीलतालाई मध्यनजर राख्दै सेनाले उनीहरुको पहिचान खुलाएको छैन । विद्युत प्राधिकरणका कर्मचारीले हेलिकोप्टर सिंगटीस्थित प्राधिकरणको सबस्टेशनमा मंगलवार अपरान्ह पाँच बजे अवतरण भएको दाबी गरेपनि त्यो विहीवार दिउँसोसम्म सही सावित भएन ।
 

No comments:

Post a comment

top sidebar ads

समाचार

समाचार

recent posts comments tab

Blog Archive